L’assoziaziun

Ai 12 de dezëmber dl 2024 nasc l’Alianza dla Cultura (ADKC) ofizialmënter sciöche assoziaziun. A ce él n consëi diretif de nü porsones che laora sön na basa volontara y che vëgn da organisaziuns desfarëntes che fej pert dla rëi y che laora toch adöm cun le team operatif. Implü unse contat cun les aministraziuns, le monn dla politica y dl’economia, sciöche ince cun organisaziuns jomelines tla Talia, tl’Austria, tla Germania y tla Svizra.

Cunlion, dajon usc ala tematiches y nfurmon

La cultura tl Südtirol à truepa fassëtes. La ie da vivanda pervia de truepa persones mpeniedes che dejëuj cun dedizion n lëur de valuta per la coletività, sibe a livel de ulentariat che a livel prufesciunel. Coche Alianza dla Cultura – y coche union de lies, urganisazions, federazions, istituzions y coletifs dla cultura sudtiroleja – ulons crië, tres nosta rë, de miëura cundizions che ebe nce plu dureda per chi che ie atifs tl ciamp culturel. L fajon afruntan deberieda tematiches de politica culturela, dajan inant nfurmazions, metan a jì descuscions y culaburazions y purtan inant la tematiches che nes sta a cuer dan chi che tol la dezijions. Davia che nosta ujes ie plu stersces sce les lascions audì deberieda pudons fé avané nosta forza y fazion.

Por ci che i se dun da fá …

I formun na rëi por tigní via la diversité dla cultura dl Südtirol. 

L’Alianza dla Cultura (ADKC) é n organism fat de tröpes organisaziuns culturales dl Südtirol. Sciöche tara partiunse idees, cosses che nes stá a cör, ressurses y competënzes. La colaboraziun y le spirit de comunanza é por nos al pröm post. 

I metun a jí regolarmënter incuntades y evënc por promöie le dialogh intercultural y fá plü sterscia la colaboraziun tla scena culturala: da incuntades informales a mëses torones moderades cina a de majeres festes dla cultura.

Lauron a livel politich.

La cultura ie for politica. Coche Alianza dla Cultura reprejentons i nteresc dla cultura sudtiroleja a livel politich y soziel. Lauron coche reprejentanza de nteres deberieda cun chi che tol dezijions politiches y cun la istituzions, acioche la cultura giape l drë recunescimënt, vënie sustenida y ududa tla sozietà y dala politica. Se mpenion a na maniera ativa y coerënta per i nteresc de chësc setor.

Cunlauron, sensibilison, crion cunsapuda.

La cultura ie pert dla sozietà: cun azions y proiec defrënc ti dajons vijibltà y fazion ala varietà culturela che caraterisea nosc raion. Nosc obietif ie chël de ti purté daujin a n publich lerch i valores dla cultura locala.

Mission / Vision

I condejun adöm la cultura dl Südtirol.

I cheriun na plataforma por organisaziuns y assoziaziuns.

I nes dun da fá por condiziuns plü iüstes y stersces por che che fej cultura.

Sciöche Alianza dla Cultura sostignunse deboriada cun nüsc comëmbri y nostes comëmbres na cultura daverta, solidara y inclusiva – che vá sura le grup linguistich, la provegnënza, l’identité, le gënder, l’eté, la capazité y la dejabilité fora. I se reconesciun ti valurs democratics fondamentai, i promoiun la coejiun y i nes daidun ativamënter un cun l’ater. Cun la comembranza se reconësc düc i comëmbri y dötes les comëmbres ADKC te chisc valurs. Nosc credo: se daurí al nü, formé la sozieté cun spirit critich y tigní i edli daverc.